- إنت عايز توصل لإيه ؟
= للعدل يا دكتور ، العدل اللى اتعلمناه و آمنا بيه
و دعت ليه الأديان كلها .
- اه عظيم طب إيه بقي العدل ف أنك تختصم الوزراء
في قضية زى دي المتهم فيها معروف و محدد بلا أى لبس ؟!
= قصد حضرتك سواق الأتوبيس أو عامل التحويلة ؟!
أو حتى هيئة السكك الحديدية نفسها ! أنت عرفت أن بالكشف الطبى ع السواق أتضح أنه كان متعاطى مخدرات ؟
- عارف عارف أنه مذنب و لازم يأخد جزاءه بس مش هو لوحده طبعاً ، هو و عامل التحويلة ، و ملاحظين السينافورات ..
= يا فندم أرجوك افهمنى الأتوبيس مدخلش فى القطر
من نفسه و لو حتى صدفة فيه مسئول ورا دا كله هو اللى وصل مزلاقانات القطر أنها تكون م غير إشارات و هو اللى خلي سواق الأتوبيس اللي المفروض أنه مسئول عن أرواح البنى أدمين يأخد مخدرات .
- ما هو دا بيحصل ف أى مكان ف العالم ..
= أيوه بس بيبقي فيه حساب و بتتحدد المسئوليات بدقة كل واحد بيأدى واجبه و لما يحصل الخطأ بيبقي معروف مين بالظبط المخطىء و يتحاسب .
- يعنى أنت عايز وزير النقل يعدى بنفسه ع السنافورات سنافور سنافور و يتأكد أن الإشارات شغالة ؟
= لازم يبقي فيه مسئول حقيقى مش كبش فدا يتحاسب و يأخد جزاءه المسئول عن وسائل النقل ف البلد هو وزير النقل مش عامل المزلقان و المسئول عن تأمين حياة تلاميذ المدارس و حمايتهم هو وزير التربية و التعليم مش سواق أتوبيس الرحلة و المسئول عن ال 2 رئيس الوزراء ، القضية لازم تتطرح كدا اللى راحوا بنى آدميـــن .. بشـــر أرواح بريئة ملهاش ذنـــب .. لو المسئولين عن ضياعهم أتحاسبوا و خدوا جزاؤهم هيفكروا 1000 مرة بعد كدا عشان ميقعش خطأ أو إهمال مشابه .. الإهمال لما يوصل للدرجة دى يبقي جريمة بشعة لابد م التحقيق فيها .
- ممم ... ما تيجى ننسى الكلام الكبير دا شوية .
= حضرتك علمتهولنا ف الكلية و كتبتهولنا ف كتب .
- البلد مش مستحملة هزات .
= البلد مش هتتقدم إلا بمواجهة أخطاءها مش عيب أننا نبقا بلد متخلف لكن العيب الحقيقى أننا نحط راسنا ف الرمل و منواجهش التخلف دا إذا كان حد قلبه ع البلد دى بصحيح لازم يقف يِحاسب و يتحاسب .
فيلم ضد الحكومة